Zbulo të panjohurën

Bora bllokon një lagje në fshatin Arllat të Drenasit

Një qytetar ka raportuar në KALLXO.com se bllokimi i rrugës nga bora po e vështirëson daljen deri te qendra e votimit në fshatin Arllat të Drenasit.

Qytetari që ka raportuar ka dërguar edhe disa fotografi të rrugës “Pika Prita” në fshatin Arllat të Drenasit.

Ai ka thënë se është e pamundur që me vetura të thjeshta të kalohet nëpërmjet kësaj rruge.

Përgjatë kësaj rruge, qytetari deklaroi se janë rreth 25 familje.

Këto janë fotografitë nga kjo rrugë:

Kosova po përballet me një mot me reshje të dendura të borës që nga dita e djeshme.

KALLXO.com raportoi sot se një ekip prej 3 vëzhguesish dhe dy komisionerësh, të cilët janë nisur për në qendrën e votimit në Shalë të Bajgorës, janë bllokuar pasi rruga është e papastruar.

Sot po mbahen zgjedhjet e parakohshme parlamentare në Republikën e Kosovës.

Vendvotimet janë hapur në ora 7:00.

Zgjedhjet e parakohshme vijnë si rezultat i vendimit të Gjykatës Kushtetuese, e cila ka urdhëruar mbajtjen e zgjedhjeve të reja pasi ka anuluar vendimin për zgjedhjen e Qeverisë së Avdullah Hotit.