Zbulo të panjohurën

Edhe sot vazhdojnë gërmimet në Rashkë, vendin ku u gjetën eshtra shqiptarësh

Drejtori i Institutit të Mjekësisë Ligjore të Kosovës, Arsim Gërxhaliu, mbrëmë bëri të ditur se në Kizhevak të Serbisë, janë gjetur mbetje mortore e që besohet se janë të shqiptarëve të vrarë gjatë luftës në Kosovës.

Ai bëri të ditur se gërmimet do të vazhdojnë edhe sot, por pasi të zhvillojnë një takim me zyrtarët serbë.

“Sot (dje) ekipi mjekësor më lajmëroi se kanë hasur mbetje mortore dhe ne menjëherë jemi nisur në Kizhevak. Nesër (sot) në orën 9 të mëngjesit do ta kemi një takim me zyrtarët serbë për të vazhduar tutje me gërmime”, ka thënë Gërxhaliu.

Ai tutje ka thënë se sipas legjislacionit serb, tash duhet të njoftohet prokurori dhe të vazhdojnë gërmimet.

“Sapo ka mbërri ekipi ynë kanë hasur në pjesë kockore dhe ne tash jemi në vendin e ngjarjes. Terreni është shumë i keq, është pjesë malore mes Rashkës dhe Kizhevakut dhe në atë pjesë që 16 vjet janë hedhur gurë dhe mbetje tjera nga minierat. Po ashtu do t’i shikojmë edhe kushtet meteorologjike sepse mund të ketë mundësi të shembjes së dheut aty”, ka thënë Gërxhaliu.

Edhe Kushtrim Gara, udhëheqës i Njesisë së Komisionit Qeveritar për Persona të Zhdukur, ka konfirmuar se kanë hasur në mbetje mortore në Kizhevak të Rashkës.

“Ju konfirmojmë se jemi njoftuar që është hasur në mbetje mortore në lokacionin në Kizhevak, në lokacionin që është duke u punuar, në kuptimin e gërmimit vlerësueses nga viti 2015”, tha Gara.

“Dy ekspertë të Republikës së Kosovës tani janë të pranishëm në lokacion, në fakt janë të pranishëm gjatë këtyre tri javëve të fundit. Po ashtu si delegacion jemi rrugës dhe besoj pas pak do të jemi në lokacion. Hollësitë tjera , do të konfirmohen në ditët në vijim”, ka deklaruar ai.